Don Bento

Os libros da merenda!

Inauguramos a liña de Urco Infantil cunha proposta innovadora no mercado editorial galego: unha colección de mini-libros ao popular prezo de 2.5 euros a unidade.

 

libros para agasallar

Esta semana, libros de agasallo no web

Urco editora únese á celebración da semana do libro agasallando a todos os que merquen libros a través do web cun libro de balde.

libros para agasallar

Libros para agasallar

Hoxe, 23 de Abril, celébrase o día internacional do libro e a lectura. Como non podía ser doutro xeito, en Urco Editora sumámonos a esta celebración cunha iniciativa pensada para os nosos lectores.

Todo aquel que merque calquera libro a través da nosa páxina web, recibirá de balde outro, a escoller entre os seguintes:

O corvo, Edgar Allan Poe (1ª edición)

Sleepy Hollow e outros relatos, Washington Irving (1ª edición)

Relatos de terror sobrenatural, Robert E. Howard (1ª edición)

Planilandia, Edwin A. Abbott (1ª edición)

A princesa e o trasno, George MacDonald

Se o socialismo chegase, Edward Bellamy (1ª edición)

Nun vidro misterioso v. 1, Sheridan Le Fanu

Nun vidro misterioro v. 2, Sheridan Le Fanu

O monstro metálico, Abraham Merritt

 

O procedemento é moi sinxelo. Abonda con realizar unha compra de xeito regular e despois enviar un correo electrónico a info@urcoeditora.com, indicando o nome do comprador,  o libro  mercado e o libro que se desexa recibir como agasallo.

Como sempre, os gastos de envío serán de balde, polo servizo postlibris de Correos.

Esta promoción remata o día 30 de Abril. Apurade para conseguir os vosos libros!

Cegoñas no fondo da ría

“Cegoñas no fondo da ría” ou unha outra Pontevedra

Cegoñas no fondo da ría

Cegoñas no fondo da ría

O novo traballo de Manuel Lourenzo González

Cegoñas no fondo da ría é un conxunto de vinte e cinco relatos que recollen outros tantos episodios da historia de Pontevedra nos que os feitos reais se prolongan polos vieiros da fantasía a través de prodixiosos exercicios de imaxinación. Cunha traza de perfecta verosimilitude, vemos desfilar polas rúas antigas desta cidade persoeiros de proxeccción universal como Xulio César, o Preste Xan, Góngora, Carlos de Médici, don Dinís de Portugal, Jules Verne, Michael Curtiz, Elvis Presley, Hemingway ou Buffalo Bill. Asistimos á convivencia entre humanos e sereas, mouras, princesas meigas, santos laicos, exércitos aztecas, alquimistas, mulleres de ciencia clandestinas, mortos revividos; e revisamos sucesos transcendentes como o Diluvio Universal de Pontevedra, o descubrimento da pedra de Rosetta da cultura castrexa, o desembarco dos atlantes, o misterio do coloso de Tambo, a queima da Biblioteca Panxeica, a lenda do Pontevedrés Errante, a chegada da Gioconda ao Museo Provincial, a aterraxe do primeiro dirixíbel ou a construción dunha réplica da cidade na selva africana. En palabras de Luís Bará, autor do Limiar, «seguramente moi poucas cidades no mundo poderán presumir de contar cun corpus de crónicas tan cheas de sucesos transcendentes e, nunca mellor dito, marabillosos.»

Publicadas ao longo dos dous últimos anos no xornal dixital Pontevedra Viva e reunidas agora en libro, Cegoñas no fondo da ría presenta unha Pontevedra inédita e máxica e ao mesmo tempo asombrosamente verosímil polo esforzo de documentación que sustenta cada unha das ficcións. Construída cunha prosa sólida e precisa que mestura características do texto histórico, o literario e o xornalístico, Manuel Lourenzo González consegue crear un universo engaiolante cuxo interese vai máis alá do local pola súa dimensión simbólica e como modelo dun xeito de reinterpretar a historia desde a poética da ensoñación e o mito.

Acceder á ficha do libro

 

Manuel Lourenzo González

Manuel Lourenzo González

Manuel Lourenzo González

Naceu en Vilaboa, Pontevedra, en 1955. Licenciado en Ciencias da Educación e catedrático de instituto en Lingua Galega e Literatura. Como profesor, participou na elaboración de libros para o ensino e é autor de artigos e textos ensaísticos de carácter dispar. Asemade, foi promotor ou colaborador de múltiples empresas culturais.

Como escritor, ten publicadas case unha trintena de obras. Entre elas, os libros de relatos Da esfinxe e Noites de papel e as novelas Arqueofaxia, O xardín das pedras flotantes e Atl. Para o público xuvenil, Tanis I o MocosO que é a vida, Irmán do ventoFlor de area, Unha pantasma no colexio e Mundo Arb. Tamén conta con publicacións infantís e teatrais. Algúns destes títulos foron traducidos ao castelán.

A súa obra foi recoñecida con premios como o Merlín, O Barco de Vapor e Estornela na literatura infanto-xuvenil, e García Barros, Café Dublín, Carvalho Calero, Xerais e Blanco Amor na de adultos.

No ámbito do xornalismo, destacan as súas colaboracións na revista de humor Retranca entre 2007 e 2010, e a serie de artigos publicados no xornal Pontevedra Viva que se reúnen neste libro.

o terror sobrenatural na literatura

A «Biblioteca Lovecraft» supera o seu ecuador cunha novela longa e un ensaio

Chegan ás librarías os volumes VIII e IX da «Biblioteca Lovecraft», cos títulos A procura soñada de Kadath a descoñecida e O terror sobrenatural na literatura

A procura soñada de Kadath a Descoñecida

A procura soñada de Kadath a Descoñecida

A publicación da «Biblioteca Lovecraft» avanza inexorábel xa superado o seu ecuador. Deixamos atrás o chamado «Ciclo de Cthulhu», que se compón dos relatos e novelas curtas máis recentes e asemade máis coñecidos do autor de Providence. Logo, internámonos no «Ciclo do Soño», que fechamos co volume VIII: A procura soñada de Kadath a descoñecida, a novela máis longa do autor e que relata as aventuras de Randolph Carter, experto soñador a quen coñecemos no volume anterior, na súa procura da cidade mítica de Kadath, alén do Deserto Frío, nos confíns do país do soño dos humanos.

Mais antes de abordar os últimos volumes da colección, que estarán dedicados aos chamados «Contos Macabros», obra dun Lovecraft máis novo e de gusto gótico, facemos unha pequena parada no eido da reflexión sobre a literatura arrepiante como realidade histórica.

o terror sobrenatural na literatura

o terror sobrenatural na literatura

O terror sobrenatural na literatura, noveno volume da colección, afonda na historia da literatura terrorífica, desde as súas orixes nos ritos máxicos e místicos do ser humano primitivo, até as primeiras décadas do século XX, onde se desenvolve o chamado «terror materialista» do que o propio Lovecraft é o maior expoñente. Trátase dunha obra indispensábel, un texto de referencia para todo amante da narrativa de medo, agora por primeira vez dispoñíbel na nosa lingua.

irmandade do libro premios

A biblioteca “gótica” de Urco recibe o premio “irmandade do libro” á mellor obra editorial

A biblioteca “gótica” de Urco editora recibiu o pasado sábado 14 de marzo o premio “Irmandade do libro”, que concede a Federación de Librarías de Galiza, á mellor Obra Editorial, na XXIV edición destes premios.

irmandade do libro premios

A estatuiña e o diploma, xunto con algúns exemplares da biblioteca “gótica”

No acto, que transcorreu na tarde do 14 de marzo na Cidade da Cultura de Compostela, foron galardoados tamén a libraría O Pontillón, de Moaña, na modalidade de mellor libraría; o IES Castro Alobre, de Vilagarcía, na modalidade de Centros de Ensino; o programa de televisión Libros sen reservas, do noso colega Quique Alvarellos, na modalidade de Fomento da Lectura; Yolanda Castaño, na modalidade de Autora; Contos do Mar de Irlanda, de Xurxo Souto (Xerais), na modalidade de mellor libro do ano; e  Xiquixoque, fiú-fiú, de Uxía Senlle (Galaxia), na modalidade de mellor obra infanto-xuvenil.

Foto galardoados

Imaxe dos galardoados e as autoridades. (Fonte da fotografía: Concello de Santiago)

Tal e como sinalou durante o acto o noso compañeiro Tomás González Ahola no momento de recoller o galardón, este é o primeiro recoñecemento deste tipo que recibe o noso proxecto editorial, logo de case oito anos de traxectoria nas letras do noso país. Queremos lembrar tamén que a colección Gótica, a que recibiu a distinción, é a máis veterana do noso selo editorial, pois o seu inicio remóntase ao ano 2007, coa publicación de O corvo, de Edgar Allan Poe.

Desde Urco queremos agradecer á Federación de Libraría de Galiza ese recoñecemento ao noso traballo e tamén desexamos parabenizar os demais premiados desta vixésimo cuarta edición deste galardón.

Presentación de "A batalla por Avalon" Libraría Aenea

Presentación de “A batalla por Avalon” na libraría Aenea

Presentación de "A batalla por Avalon" Libraría Aenea

Presentación de “A batalla por Avalon”

A batalla por Avalon de Fernando M. Cimadevila, terceira entrega da serie de fantasía O mundo secreto de Basilius Hoffman, presentarase en Compostela o vindeiro xoves 26 de febreiro na libraría Aenea (Rúa Irmáns Rey Alvite, 5), ás 20:00. Contaremos coa presenza do autor e máis da ilustradora, Jara Zambrano, que asinarán exemplares e exporán o seu traballo.

Sinopse de A batalla por Avalon:

A illa da sabedoría atópase en perigo, a Irmandade de Avalon debe enfrontarse á súa batalla definitiva contra un antigo mal que regresa para cumprir vinganza. O profesor Hoffman e o seu sobriño Peter veranse envolvidos nunha escura conspiración, que os levará a descubrir novos misterios e a desentrañar unha mentira que durante anos pesara sobre todos eles.

Continúan as aventuras do profesor Basilius Hoffman: historiador e explorador de mundos ocultos, cabaleiro a tempo parcial e truán a xornada completa, que, na súa procura do lendario Diario do Cartógrafo, verase enleado nunha aventura chea de asombrosas criaturas, incríbeis artefactos mecánicos, reliquias de inimaxinábel poder e, tamén, a descubrir a porta a un novo e fascinante mundo secreto.

 

Ligazón á ficha do libro no noso catálogo

cartaz presentación "A vitoria final"

Presentación de “A vitoria final” na libraría A Gata Tola

cartaz presentación "A vitoria final"

Presentación de “A vitoria final” (‘Azken Garaipena’), venres 13 de febreiro ás 18h na libraría “A Gata Tola”

A vitoria final (‘Azken Garaipena’) de Julen Ribas e Iban Zaldua, banda deseñada gañadora do premio Euskadi de literatura xuvenil e publicada en galego por Urco Editora, será presentada en Compostela o próximo venres 13 de febreiro na libraría A gata tola (Romero Donallo, 9), ás 18:00.

Sinopse de A vitoria Final:

A tenente Sigrid Frisch devece polos cómics. Leos na comisaría de policía cando non ten outra angueira. Mais en poucas ocasións pode rematar a lectura tranquilamente. Recibe un aviso xusto cando está a ler o clásico que conta como gañou Alemaña a II Guerra Mundial: uns cativos atoparon un cadaver nun gran canal.
Ao chegar ao lugar dos feitos decátase de que terá problemas co caso. Ao pé do corpo, alén da policía, andan unha Oberstandartenfürher das SS e os seus soldados a fisgar. Que fan alí? Só é un afogado. O cadáver non ten identificación e na man hai un papel do que termaba con forza. E o máis sorprendente: o bandullo ten embigo! Algo imposíbel na Alemaña de 2052, ano CVII da Vitoria. Non, non será un caso doado.

Ligazón á ficha do libro no noso catálogo

 

A batalla por Avalon

O mundo secreto de Basilius Hoffman. A batalla por Avalon

A batalla por Avalon

O mundo secreto de Basilius Hoffman. A batalla por Avalon

A batalla por Avalon é a terceira e agardada entrega da serie de fantasía O mundo secreto de Basilius Hoffman, de Fermando M. Cimadevila.

Neste terceiro volume continúan as aventuras do profesor Basilius Hoffman e do seu sobriño Peter, que deben unir as súas forzas coas dos membros da Irmandade de Avalon para defender a Illa da Sabedoría dun mal antigo que ameaza o mundo feérico e o dos humanos.

 

A serie O mundo secreto de Basilius Hoffman

As fantásticas aventuras do profesor Hoffman comezaron en 2010 coa publicación en Urco Editora de O ladrón de soños, a primeira entrega da serie que axiña esgotou a primeira edición por mor da magnífica acollida que obtivo entre as lectoras e lectores do noso país. No Nadal de 2012 seguiuna Un faro na escuridade, segunda entrega desta pentaloxía e á fin, no comezo de 2015 sae ao público A batalla por Avalon, o volume central da serie que agardamos colleite tantos éxitos como as dúas obras precedentes.

Unha das novidades nesta nova entrega son as magníficas ilustracións de Jara Zambrano, artista moi consagrada no xénero fantástico e que xa colaborou noutros títulos de Urco. O deseño de cubertas vén da man de José María Picón, portadista habitual na nosa colección Alcaián, así como noutros proxectos vinculados á literatura fantástica, como por exemplo a editorial Contos Estraños.

Podes descargar unha mostra de A batalla por Avalon aquí: A batalla por Avalon. PREVIEW.

O libro áchase en fase de prepublicación e verá a luz no prazo de unha semana, aproximadamente. Se o desexas podes facer unha reserva do teu exemplar e aproveitarte dun 10% de desconto e mais dos gastos de envío de balde. Preme aquí para efectuar a túa compra.

Fernando M. Cimadevila

Fernando M. Cimadevila

Fernando M. Cimadevila

Naceu en Compostela no ano 1977. Forma parte activa do panorama literario galego como escritor e editor.
Desde 2011 é director literario de Contos Estraños, editora especializada en literatura fantástica, de terror e de ficción científica, que reúne unha nova xeración de escritores do xénero.
Como escritor destaca o seu labor en literatura infantil coa colección As aventuras do Apalpador e a serie de fantasía O mundo secreto de Basilius Hoffman. Tamén foi finalista do Premio Desnivel coa súa novela de viaxes e investigación Acariciando el cielo.
Entre as súas afeccións deportivas destacan o taekwondo, o trekking e durmir a sesta cos seus gatos.

Blog de Fernando M. Cimadevila

 

Jara Zambrano

Jara Zambrano

Jara Zambrano

Desde pequena sempre soubo que o que máis lle gustaba era debuxar.
Decidiu estudar artes e, aínda que ía ben encamiñada, desviouse do seu camiño por un tempo para probar Restauración de Bens Culturais en Pontevedra.
Ao se decatar de que, malia que esta carreira era preciosa, necesitaba urxentemente volver crear, decidiu retomar a idea orixinal e cursar os estudos de Deseño Gráfico na escola Pablo Picasso de A Coruña.
Tras terminar os estudos e se embarcar en varios proxectos, fixo tres estancias de prácticas en empresas de comunicación gráfica de Angoulême, Francia, e, inspirada polo que alí viu, decidiu que montar o seu propio estudio non era unha idea tan disparatada.

 Blog de Jara Zambrano 

 

Vídeo promocional de O mundo secreto de Basilius Hoffman. O ladrón de soños

Vídeo promocional de O mundo secreto de Basilius Hoffman. Un faro na escuridade

Dous novos títulos na colección Alcaián

Este mes de novembro vimos de tirar do prelo dúas novidades da colección Alcaián: Flash-Black 13 e Hostal Norte. O primeiro é unha recompilación de relatos fantásticos de Ramón Caride (recoñecido autor gañador, entre outros, do Premio Blanco Amor) e o segundo; unha novela de terror psicolóxico de Xosé Duncan con ilustracións de José María Picón.

Xa están á vosa disposición no noso carro da compra.

Capa Hostal NorteCapa Flash-Black 13