Inauguramos a Biblioteca Lovecraft 24th Marzo 2011 – Posted in: Novidades

Comprácenos comunicarvos que o primeiro título da nosa Biblioteca Lovecraft vén de ver a luz. Trátase d’A chamada de Cthulhu e contén seis relatos da primeira etapa deste autor que marcaron as pautas do mito que viría despois. Esperamos que gustedes deste primeiro volume tanto como nós.

Toda mitoloxía ten uns alicerces e toda épica ten uns inicios, e o chamado “Ciclo de Cthulhu”, polifonía estridente e impía que desafía toda cordura, non podía ser menos. Neste volume preséntanse as primeiras obras de H.P. Lovecraft nas que se perfila este inmenso e complexo cosmos estarrecedor poboado das máis aberrantes entidades. Dos poboadores prehumanos e extraterrestres de “A maldición que caeu sobre Sarnath” ás areas de Arabia que sepultan a esquecida “Cidade sen nome”, dos saqueadores de tumbas de “O sabuxo” aos escuros segredos de Nova Inglaterra que relata “O festival”, dos adoradores de Nyarlatothep de “Os soños da casa da bruxa” a, como non, os sanguinarios cultistas de “A chamada de Cthulhu”, estas páxinas revélannos o nacemento dunha das mitoloxías máis importantes do século XX.